هێرشی ئاسمانی ڕووسیا بۆ سەر کیێڤ چەند کوژراو و برینداری لێکەوتەوە

پەیامی کورد   ...   هێرشی ئاسمانی ڕووسیا بۆ سەر کیێڤ چەند کوژراو و برینداری لێکەوتەوە

لە دوایین هێرشی شەوانەی ڕووسیا بۆ سەر کیێڤ، بەرەبەیانی ڕۆژی شەممە ٨ی سەرماوەز، مووشەک و فڕۆکەی بێفڕۆکەوانی خۆکوژی لە ناوچە جیاجیاکانی پایتەختی ئۆکراین یان داوە. وەزارەتی ناوخۆی ئۆکراین ڕایگەیاند، لانیکەم دوو کەس گیانیان لەدەست داوە و زیاتر لە ١٠ کەسیش برینداربوون کە منداڵیش لەناویان دا هەیە.

چەندین باڵەخانەی نیشتەجێ بوون زیانیان بەرکەوتووە و بە سەدان شوێن ڕووبەڕووی پچڕانی کارەبا بوونەتەوە. لەم هێرشەدا دامەزراوەی ووزە لە کیێڤ و پێنج ناوچەی دیکەش کرانە ئامانج نزیکەی ٥٠٠ هەزار ماڵ لە پایتەخت ژیانیان پەکی كەوتووە.

کیێڤ لە چەند هەفتەی ڕابردوودا چەندین جار بە مووشەکی بالیستیک، کرووز و فڕۆکەی بێفڕۆکەوانی ڕووسیا کراوەتە ئامانج. ئەمەش لە کاتێکدایە کە دانووستانەکان لەسەر پلانی ئاشتی ٢٨ خاڵی ئیدارەی ئەمریکا لە نێوان ئۆکراین و ڕووسیا بەردەوامە، بەڵام ئاسۆی گەیشتن بە ڕێککەوتن تا ئێستا نادیارە.