Guhertina hevsengiyan li Beyrûdê: Şer rêya danûstandinan vekir

PeyamaKurd - Rojnameya Lubnanî El Exbar di analîzeke berfireh de nivîsî ku "peymana çarçoveyî ya Lubnan-Îsraîlê" ne gava yekem a têkiliyên di navbera her du aliyan de ye.

Rojnameyê diyar kir, ew peyman berdewama dîrokeke dirêj a peywendî û peymanan e.

Hate destnîşankirin ku ev pêvajo bi temamî bi guhertinên hevsengiya hêzê ya navxweyî û herêmî ve girêdayî ye.

Îsraîlê hişt ku helwesta siyasî biguhere

Li gorî rojnameyê şert û mercên nû yên piştî şerê li Şerîda Xeze û zêdebûna fişar û aloziyên leşkerî yên Îsraîlê yên li dijî Lubnanê, bandoreke rasterast li ser helwesta siyasî ya herêmê kirine û rewşa hevkariyên neçarî guhertine.

Rojnameyê bal kişand ser guhertinên di qada siyasî ya navxweyî ya Lubnanê de û diyar kir ku piştî qelsbûna pêgeha Hizbullahê, hawîrdorek nû li welat afiriye.

Êdî opozîsyon danûstandinên Îsraîlê qebûl dike

Ev rewşa nû bû sedem ku hin hêzên siyasî yên Lubnanî ji bo xurtkirina pozîsyona xwe ya navxweyî û parastina berjewendiyên xwe, vebijarka danûstandinên rasterast ligel Îsraîlê qebûl bikin.

Di analîzê de hat destnîşankirin ku ev pêngav weke stratejiyeke nû ya hêzên navxweyî tê dîtin daku di qonaxa bê de pêşî li her cûre valahiya desthilatê were girtin û hevsengiyeke nû di navbera aliyan de bê tomarkirin.