Artêşa Îsraîlê: Me li Bêrûdê fermandarekî payebilind ê Hizbullahê kuşt

PeyamaKurd - Hêzên Parastina Îsraîlê (IDF) bi daxuyaniyeke fermî ragihand ku wan di êrîşeke asmanî de li paytexta Lubnanê, Bêrûdê fermandarekî pilebilind ê Pasdarên Şoreşa Îranê kuştiye ku di yekîneya mûşekî ya Hizbullahê de kar dikir.

Hat diyarkirin ku navê fermandarê hedefgirtî Ebû Zerr Mihemedî ye. Li gorî daxuyaniya artêşa Îsraîlê, Mihemedî vê hefteyê di encama operasyoneke asmanî ya serkeftî de hatiye bêbandorkirin.

Artêşa Îsraîlê îdia kir ku Ebû Zerr Mihemedî di hevrêziya leşkerî ya di navbera Hizbullah û rejîma Îranê de xwedî “roleke navendî” bû. Mihemedî wekî kesayetiyekî sereke di pêşxistina şiyanên mûşekî yên rêxistinê de dihat dîtin û di heman demê de wekî “desthilatdarekî sereke” li ser çekên stratejîk ên Hizbullahê dihat hesibandin.

Ev êrîş di demekê de pêk tê ku Îsraîl operasyonên xwe yên li dijî serkirdeyên leşkerî yên Hizbullahê û şêwirmendên Îranî yên li Lubnanê dijwartir kiriye da ku şiyana mûşekî ya rêxistinê lawaz bike.