Ehmed Hilalî: Pêşketin di entegrasyona hêzên HSDê di saziyên Sûriyeyê de hatine çêkirin
PeyamaKurd - Berdevkê tîma serokatiyê Ehmed Hilalî ya ku bi şopandina pêkanîna peymana 29ê Çile bi HSDê re hatiye erkdarkirin diyar kir ku civîna doh a di navbera Ehmed Şera û Mazlûm Ebdî de peymanek nû pêk neaniye, lê belê beşek ji pêvajoya şopandinê ya derbarê entegrasyona hêzên HSDê di nav saziyên Sûriyeyê de bû.
Di daxuyaniyekê de ji bo kanala El-Îxbariya ya Sûriyeyê, Ehmed Hilalî destnîşan kir ku peymana 29ê Çile ji aliyê serokatiyê ve rasterast tê şopandin, û diyar kir ku civînên taybet ên di derbarê vê dosyayê de bi awayekî demkî bi rêya Wezareta Karên Derve û tîma Serokatiyê têne lidarxistin. Wî zêde kir ku civînên meydanî bi rêberên HSDê re armanc dikin ku planên ji bo qonaxa din pêşve bibin.
Berdevk herwiha diyar kir ku peymana 29ê Çileya 2026an ji bo temamkirina pêvajoya entegrasyonê mehek destnîşan kiriye, lê pêkanîn ji ber tevliheviyên îdarî û rêxistinî dereng ketiye.
Hilalî pêşketina di pêvajoya yekbûnê de piştrast kir û diyar kir ku hêzên HSDê lîsteyên navan pêşkêşî Fermandariya Firqeya 60an kirine û xebat ji bo avakirina lîwayek li parêzgeha Hesekê di nav vê firqeyê de berdewam dike.
Wî destnîşan kir ku her lîwayek wê ji nêzîkî 1300 şervanan pêk were û hejmarek efser wê ji bo fermandariya van yekîneyan qursên perwerdehiyê yên taybetî bibînin. Ehmed Hilalî herwiha diyar kir ku Wezareta Karên Hundir wê rêveberiya zindanên ku berê di bin kontrola hêzên HSDê de bûn bigire ser xwe.
Wî ev mijar wekî yek ji dosyayên hesas bi nav kir ku di qonaxên amadekariyê de ye û hêdî hêdî li ser tê xebitîn.
Berdevk herwiha got ku di pêşerojê de gavên din wê werin avêtin, wekî vekirina deriyên sînor ên nû û xurtkirina ewlehiyê, û herwiha vekirina dadgehek ji bo baştirkirina karûbarên dadwerî.
Derbarê sedema derengketina pêkanîna peymanê de, Hilalî wiha got:
"Zehmetî bi ji nû ve sazkirina saziyan ve girêdayî ne. Parêzgeha Hesekê zêdetirî 60 rêveberî hene ku divê ji nû ve werin rêxistin kirin û ji hêla îdarî ve di bin saziyên hikûmetê de ne. Wekî din, hebûna saziyên ku bi salan bêkar mane, digel saziyên din ên ku ji hêla HSD ve hatine damezrandin, bûye sedema tevliheviya îdarî ku çareseriyek qonax bi qonax hewce dike."
Ehmed Hilalî di derbarê sektorên perwerde û xizmetguzariyê de axivî û destnîşan kir ku rêveberek perwerdehiyê ji bo Hesekê hatiye tayîn kirin û dibistanên zirar dîtine hatine tamîr kirin. Hilalî diyar kir ku vegera nêzîkî 2,000 malbatan ji tevahî 8,000 malbatan bo Efrîn alîkarî kiriye ku zexta li ser dibistanan sivik bibe, û vegera malbatên din jî berdewam dike.
Derbarê dosyaya hemwelatîbûnê de, Hilalî tekez kir ku agahdariya ku di derbarê dayîna hemwelatîbûnê de belav dibe xelet e, û rave kir ku kar bi lêkolîn û pêvajoya serlêdanên ji kesên neqeydkirî li gorî prosedurên qanûnî û ewlehiyê yên hişk ve sînordar e.