Erdheja siyasî li Tehranê: Ofîsa Xameneyî û navendên îstîxbaratê hatin hedefgirtin

PeyamaKurd – Sibeha îro Şemî, 28ê Sibata 2026an, Tehran bi teqînên ku dilê desthilatdariya Îranê hedef girtine şiyar bû.

Li gorî agahiyên destpêkê yên medyaya Îranî û navneteweyî, di operasyoneke hevbeş a Îsraîl û Amerîkayê de cihên herî krîtîk ên serkirdayetiya Îranê hatine bombebarankirin.

Tê îdiakirin ku ofîsa Rêberê Bilind ê Îranê Elî Xameneyî ya li navenda paytextê, bûye armanca serke ya vê êrîşê.

Tevî ku rayedarên Tehranê heta niha derbarê rewşa tenduristiya serkirdayetiyê û qurbaniyan de daxuyaniyeke zelal nedane, nezelalî û metirsiyeke mezin li kolanên paytextê serdest e.

Êrîş tenê bi ofîsa rêberê olî re sînordar neman; raporên çapemeniya erebî diyar dikin ku avahiya Wezareta Îstîxbarata Îranê jî rasterast hatiye lêdan.

Hevdem, li rojhilatê Tehranê ku baregehên sereke yên Pasdarên Şoreşê (IRGC) lê ne, dengê rêze teqînên mezin hatine bihîstin. Her çend asta zirara li ser dezgehên leşkerî bi fermî nehatibe piştrastkirin jî, aktîfbûna pergalên parastina asmanî li seranserê bajêr nîşana êrîşeke esmanî ya berfireh û plankirî ye.

Medyaya Îsraîlî bi baldarî vê operasyonê dişopîne û îdia dike ku hedefa sereke "baregeha serokatiyê" û navendên biryardayînê yên Tehranê ne.

Li gorî raporên çapemeniya Îsraîlê, di vê operasyonê de gelek "sûîqestên hedefgirtî" li dijî kesayetên payebilind ên leşkerî û siyasî hatine pêkanîn. Ev îdia hîn bi awayekî serbixwe nehatine piştrastkirin, lê daxuyaniyên Wezîrê Parastina Îsraîlê Yisrael Katz ku gotibû "me operasyoneke pêşîlêgirtinê da destpêkirin", giranî dide van îdiayan.

Niha hemû çav li ser daxuyaniyên fermî yên Tehranê ne da ku berfirehiya zirarê û çarenûsa serkirdeyên hedefgirtî zelal bibe.

Ev êrîş di dîroka komara îslamî de wekî rûbirûbûna herî dijwar a li nav dilê paytextê tê nirxandin.