Erdhejek tirsnak li Tehranê çêbû!

PeyamaKurd - Paytexta Îranê Tehran û deverên derdora wê bi erdhejeke bi hêza 4.6 pileyî hejiya. Erdhejê tirs û fikarek mezin di nav niştecihên herêmê de çêkir.

Li gorî Navenda Sîsmolojiyê ya Îranê, erdhejek bi hêza 4.6 pileyî saet di 23:46an de bi dema herêmî li ser sînorê di navbera parêzgehên Tehran û Mazenderanê de çêbû.

Navenda erdhejê li nêzîkî bajarê Pardis, rojhilatê Tehranê hate ragihandin û di kûrahiya 10 kîlometreyan de hate tomarkirin.

Heta niha derbarê qurbanî an zerara milkê de tu agahiyên fermî nehatine parvekirin.

Li gorî çavkaniyên herêmî, erdhej li bakurê Tehranê, parêzgeha Mazenderanê û herêmên Pardis, Bumehen û Rudehen bi awayekî zelal hate hîskirin.

Ji ber cihê xwe yê erdnîgarî, Îran li ser gelek xetên şikestinê yên çalak e û ji ber vê yekê dem bi dem bi erdhejên ku carinan dibin sedema wêraniyên mezin re rû bi rû dimîne.