Fuad Husên: Em nahêlin axa me ji bo êrîşên li ser welatên cîran bê bikaranîn

PeyamaKurd - Wezîrê Derve yê Iraqê Fuad Husên, dema ku helwesta fermî ya welatê xwe li ser aloziyên herêmî di 165emîn civîna Konseya Lîga Erebî de diyar kir, tekez li ser biryardariya Iraqê ya parastina serweriya xwe kir.

Wezîr Fuad Husên di roja Yekşemê, 29ê Adara 2026an de, serokatiya şandeya Iraqê di 165emîn civîna Konseya Lîga Erebî de kir.

Wezîr Husên li wir axivî û bal kişand ser xetereyên zêdebûna aloziyên leşkerî li herêmê û got, "Iraq dê nebe qada şer ji bo nakokiyên herêmî û wê nebe aliyek ji bo tu şer an krîzekê."

Fuad Husên peyamek zelal ji aliyên şer re şand û got, "Hikûmeta Iraqê wê nehêle ku ax û sînorên wê ji bo tu êrîşan li dijî welatên cîran bên bikaranîn."

Husên tekez kir ku pêşîniya hikûmeta Bexdayê parastina serweriya welêt û pêşîgirtina li her çalakiyek ku wê zerarê bide ewlehî û aramiya Rojhilata Navîn e, bal kişand ser kûrahiya têkiliyên bi welatên ereb re û got, "Em ewlehiya welatên Ereb wekî beşek yekgirtî ya ewlehiya neteweyî ya Iraqê dibînin."

Ev daxuyanî di demekê de tên ku herêm di bin zextek giran a şer de ye û Bexda hewl dide ku bi rêya dîplomasiyê xwe ji encamên wêranker ên nakokiya di navbera DYA û Îranê de dûr bixe.