Îran: Êrîşên Amerîkayê berdewam bikin wê şer belav bibe

PeyamaKurd - Berdevkê Hêzên Çekdar ên Îranê Mihemed Ekremîniya, derbarê êrîşên dawî yên Amerîkayê de daxuyaniyeke hişk belav kir û hişyarî da ku heke operasyonên leşkerî yên Washingtonê berdewam bikin, dê qada şer ber bi herêmên nû ve belav bibe.

Ekremîniya destnîşan kir ku wan hîn beşeke mezin a hêza xwe ya serbazî nîşan nedaye û bersiva wan a li dijî her cûre dijminatiyê dê ji bendewariyên dijmin pir mezintir be.

Berdevkê artêşê ragihand ku riya tenê ya vekirina Tengava Hurmûzê ew e ku Amerîka vegere ser peymana 14 xalî ya ku her du aliyan di meha Hezîranê de îmze kiribû û rêzê li rênimayên Îranê yên derbarê hatûçûna keştiyan de bigire daku ev aloziya giran a li herêmê bi dawî bibe.

Di berdewamiya daxuyaniyê de, Mihemed Ekremîniya bal kişand ser êrîşên ku li dijî baregehên Amerîkayê yên li welatên Kendavê pêk tên û diyar kir ku armanca Îranê ne şerkirina ligel welatên cîran an jî dewletên îslamî yên herêmê ye.

Tekez kir ku Tehran her dem girîngiyê dide pêşvebirina peywendiyên biratî û hevkariya herêmî, lê parastina ewlehî, rûmet û berjewendiyên gelê Îranê erkê wan ê herî pîroz e.

Ev helwesta nû ya artêşa Îranê ku piştî dorpêç û lêdanên giran ên CENTCOM'ê hat tomarkirin, nîşan dide ku herêm bi rûdanên nû yên leşkerî re rû bi rû ye û hevsengiyên siyasî li seranserê Rojhilata Navîn ketine bin bandoreke pir xeternak.