Kardînal Parolin: Kurdistan modela herî serkeftî ya pêkvejiyanê ye

PeyamaKurd - Serokê Herêma Kurdistanê Nêçîrvan Barzanî, di çarçoveya serdana xwe ya fermî ya ji bo Vatîkanê de, îro ligel Serokwezîrê Vatîkanê Kardînal Pietro Parolin civiya.

Di vê hevdîtinê de, rênîşanderên pêşxistina peywendiyên navbera Herêma Kurdistanê, Iraq û Vatîkanê, rûdanên herî dawî yên siyasî û ewlehiyê yên li herêmê û rewşa giştî ya pêkhateyên dînî û etnîkî hatin nirxandin. Nêçîrvan Barzanî û Kardînal Parolin tekezî li ser berdewamkirina diyalogê û kûrkirina çand û lîteratûra tehamul û bihevrajiyana aştiyane ya li herêmê kirin.

Nêçîrvan Barzanî li ser navê Herêma Kurdistanê û Iraqê, spasiya xwe gihand Vatîkanê ji bo piştgiriya wan a herdemî ya di warê teşwîqkirina aştî, aramî û parastina mafên mirovan de.

Kurdistan wekî "Modela Zindî" hat wesifkirin

Serokwezîrê Vatîkanê Kardînal Pietro Parolin, pêzanînên kûr ên Vatîkanê pêşkêş kirin û Herêma Kurdistanê wekî "modeleke zindî û serkeftî" ya ji bo bihevrajiyana aştiyane ya dîn û nasnameyên cuda yên li Rojhilata Navîn wesif kir û rûmeta wê bilind girt.

Di civînê de, bandorên mirovî yên aloziyên serbazî û siyasî yên vê dawiyê yên li herêmê jî bi hûrgilî hatin gotûbêjkirin. Di vî çarçoveyê de, her du alî gihîştin nêrîneke hevbeş ku ji bo parastina mafên welatiyan û kêmkirina êşên mirovî, divê aştî û aramiya herêmî bi her awayî were parastin û rê li ber şerên nû were girtin.