Kewserî: Hewldana Amerîkayê ya ji bo desteserkirina uranyumê li Îsfahanê bi binketinê bi dawî bû

PeyamaKurd - General û Parlamenterê Îranî Îsmaîl Kewserî ragihand ku operasyona Amerîkayê ya li başûrê Îsfahanê, ku bi hinceta rizgarkirina pîlotekî hatibû destpêkirin, di rastiyê de hewildanek bû ji bo desteserkirina zêdetirî 400 kîlogram uranyuma zengînkirî. Kewserî destnîşan kir ku ev hewildan bi "fiyaskoyekê" û "şermezariyekê" bi dawî bûye û Amerîkayê nekarî bigihîje armanca xwe. Wî her wiha eşkere kir ku Washingtonê bi rêya Pakistan û Rûsyayê pêşniyareke 15 maddeyî pêşkêşî wan kiriye, lê Tehranê ji ber şertên "nayên qebûlkirin" ev pêşniyar bi temamî red kiriye.

Kewserî, Serokê DYA’yê Donald Trump rexne kir û îdîa kir ku Trump bi manevrayên dîplomatîk û pêşniyara agirbestê hewl dide xwe wekî "serkeftiyê qadê" nîşan bide û bi rengekî "birûmet" ji şer vekişe. Kewserî bal kişand ser ketina balafira F-15E ya Amerîkayê ya di 3’yê Nîsanê de û got ku tevî bêbaweriya wan a bi Amerîkayê, ew ji bo nîşandana rastiyan ji cîhanê re deriyê muzakereyan bi temamî nagirin. Li gorî aliyê Îranî, hêzên Amerîkayê di operasyona Îsfahanê de rastî windahiyên giran hatine û neçar mane paşde vekişin.