Li Çola Sahrayê: 50 koçber ji tîbûnê canê xwe ji dest dan

PeyamaKurd - Li bakurê Nîjerê, ji ber xirabûna kamyoneke ku koçberên ji Malî vedegeriyan vedeguhest, li Çola Saharayê karesateke mezin a mirovî rû da û 50 kesan ji tîbûnê canê xwe ji dest dan. Rêwî sînorê navbera Nîjer û Cezayîrê, li herêma 80 kîlometre rojavayê xala sînorî ya Assamakayê, bi rojan asê man û hewldanên wan ên ji bo çêkirina wesayîtê bêencam man. Walîtiya Agadezê ragihand ku ji ber germahiya pir zêde û nebûna çavkaniyên avê, li vî herêmî jiyan ji dest çûye; tenê du koçberan karîbûn bi peyaltî xwe bigihînin Assamakayê û agahiyê bidin rayedaran. Tîmên rûpêvandin û rizgarkirinê diyar kirin ku wan bi dehan cenazeyên koçberan di bin û derdora kamyonê de dîtine û ew li cihê bûyerê di goristaneke komî de veşartine.

Rizgarkirina 60 koçberên din di rêya vegerê de

Kamyona ku rastî vê karesatê hatibû, ji qesebeya Telhandek a Malî bi rê ketibû lê ji rêça xwe ya asayî derketibû. Di dema ku tîmên rizgarkirinê û leşkerên Nîjerê piştî veşartina cenazeyan vedegeriyan, rûbirûyî karesateke din a muhtemel bûn. Tîman kamyoneke din a xirabûyî dîtin ku ji ber pirsgirêka akûyê 3 rojan di çolê de asê mabû û zêdetirî 60 koçber tê de bûn. Leşkerên Nîjerê destwerdaneke bilez kirin, av û xwarin gihandin koçberên ku ji tîbûn û germê bêhal ketibûn, wesayîta wan çêkirin û ew ji mirine rizgar kirin. Ev bûyer careke din rûyê tal û xetereyên giran ên rêyên koçberiyê yên li Afrîkayê derxist pêş.