Netanyahu: Me bi sedan endamên Hizbullahê kuştin

PeyamaKurd - Serokwezîrê Îsraîlê Benjamin Netanyahu ragihand ku wan Keleha Baqifê ya dîrokî (Beaufort) li başûrê Lubnanê kontrol kiriye û diyar kir ku meha borî nêzîkî 700 endamên Hizbullahê hatine kuştin.

Di gotarekê de roja Yekşemê, 31ê Gulana 2026an, Netanyahu diyar kir ku wan Keleha Baqifê ya girîng a stratejîk li başûrê Lubnanê kontrol kiriye û vê pêşveçûnê wekî "xalek bingehîn û radîkal" di operasyonên leşkerî yên Îsraîlê de bi nav kir.

Netanyahu tekez kir ku artêşa Îsraîlê meha borî nêzîkî 700 şervanên Hizbullahê li Lubnanê bêbandor kiriye.

Netanyahu îdia kir ku ji destpêka şer ve, ku di Adara borî de zêde bû, bi tevahî 8,000 endamên Hizbullahê hatine kuştin û destnîşan kir ku operasyonên leşkerî yên bi biryar encamên pir girîng dane.

Daxuyaniyên Netanyahu di demekê de tên ku rageşiya leşkerî li eniya Lubnanê zêde dibe û operasyonên leşkerî yên Îsraîlê yên bênavber li gelek deverên Başûrê Lubnanê berdewam dikin.

Di vê navberê de, Hizbullaha Lubnanê îro bi daxuyaniyek nivîskî operasyonên xwe yên tolhildanê li dijî Îsraîlê ragihand.

Daxuyanî wiha ye: "Ji bo parastina Lubnanê û gelê wê, di bersivê de li ser binpêkirinên agirbestê yên Îsraîlê û êrîşên li ser gundên Başûrê Lubnanê ku di encamê de mirin û birîndarbûna sivîlan çêbûn, şervanên berxwedanê bi moşekan komek wesayîtên leşkerî û leşkerên Îsraîlê li bajarokê Bayyaza hedef girtin."