Reuters: Amerîka ji bo qonaxa nû ya şer amadekariya şandina hêzên bejayî dike

PeyamaKurd - Li gorî nûçeya ajansa navneteweyî ya Reutersê, Serokê Amerîkayê Donald Trump ji bo qonaxa din a şerê li dijî Îranê, vebijarka şandina hêzên bejayî bo herêma Kendavê dinirxîne. Tê ragihandin ku ev pêngav bi armanca kontrolkirina xalên stratejîk ên enerjiyê tê plankirin.

Kontrola Tevahî ya li Tengava Hurmizê

Reutersê ragihand ku rêveberiya Trump di destpêkê de armanc dike ku bi rêya hêzên deryayî û hewayî kontrola Tengava Hurmizê misoger bike. Lê belê, ji bo kontrolkirina trafîka keştiyan a bi awayekî fîzîkî û misogerkirina ewlehiya deryayî, Washington hewcedariyê bi bicihkirina hêzên bejayî li herêmê dibîne.

Hedef: Girava Xargê ya Îranê ye

Çar çavkaniyên cuda ji Reutersê re eşkere kiriye ku di nav planên leşkerî yên Qesra Spî de, vebijarka şandina leşkerên bejayî bo Girava Xargê ya li başûrê Îranê bi giranî tê nîqaşkirin. Girava Xargê ji bo aboriya Tehranê xaleke jiyanî ye, ji ber ku zêdetirî %90ê hinartina petrola Îranê ji vê giravê pêk tê.

“Vebijarkeke Xeternak”

Her çend ev plan wekî derbeyeke kujer a li ser binesaziya aborî û leşkerî ya Îranê tê nirxandin jî, pisporên ewlehiyê hişyar dikin ku şandina hêzên bejayî bo axa Îranê “vebijarkeke pir xeternak e.” Tê gotin ku ev yek çêdibe ku bibe sedema rûbirûbûneke rasterast a dijwar û berfirehbûna şer li seranserê herêmê.