Sadr: Em amade ne Seraya Selam fesih bikin

PeyamaKurd - Rêberê Tevgera Sadr, Muqteda es-Sadr, di daxuyaniyeke girîng de ragihand ku ew amade ye baskê leşkerî yê tevgera xwe, Seraya Selam, fesih bike û radestî dewletê bike. Sadr ev biryar bi cihanîna çend mercan ve girê da û destnîşan kir ku tevgera wî dê di kabîneya nû ya hikûmetê de cih negire.

Muqteda es-Sadr li ser hesabê xwe yê medyaya civakî X, bang li namzedê serokwezîrtiyê Eli Falih Zeydî kir ku li dijî gendeliyê têkoşîneke tund bimeşîne û peywendiyên derve yên Iraqê xurt bike. Sadr diyar kir ku ji bo namzedê nû karibe razîbûna gel û Tevgera Sadr bi dest bixe, divê şeş mercên sereke pêk bîne.

Şeş Mercên Sadr ji bo Hikûmeta nû

Veguherandina Komên Çekdar: Divê hemû komên çekdar, di bin sîwana Desteya Hecc û Umreyê de, veguherin saziyên alîkariya mirovî an jî komên olî.

Rêveberiya Bê-mezheb: Di avakirina kabîneyê de divê ji nêzîkatiyên siyasî û mezhebî were dûrketin.

Serxwebûna Iraqê: Ji bo serxwebûna rastîn a Iraqê xebat were kirin û rê li ber her cûre destwerdanên derve were girtin.

Têkoşîna bi Lez a li dijî Gendeliyê: Di nav 90 rojan de kampanyayeke berfireh û lezgîn ji bo ji holê rakirina gendeliyê were destpêkirin.

Xurtkirina Peywendiyên Derve: Peywendiyên Iraqê yên di asta Erebî, Îslamî û navneteweyî de werin xurtkirin.

Hikûmeta Bê-Sadr: Di kabîneya bê de divê tu endamekî "Tevgera Neteweyî ya Şîe" (Sadr) cih negire.

Ev gava Sadr wekî hewildanek ji bo kêmkirina rageşiya navxweyî ya Iraqê û xurtkirina saziyên dewletê tê nirxandin.