Serok Barzanî li ser komkujiyên Balîsan û Şêx Wesanan peyam weşand

PeyamaKurd - Serok Mesûd Barzanî di salvegera 39emîn a êrîşa kîmyayî ya li ser Balîsan, Şêx Wesanan û Geliyê Xoşnawatî de peyamek weşand û tekez kir ku divê hikûmeta Iraqê erkên xwe yên ji bo tezmînkirina malbatên şehîdan û qurbaniyên kampanyaya Enfalê bi cîh bîne.

Di peyama xwe de, ku di salvegera êrîşa kîmyayî ya ku ji aliyê rejîma Baasê ve di 16ê Nîsana 1987an de hat kirin de hat weşandin, Serok Barzanî kesên ku canê xwe ji dest dane bi rêzdarî û spasdarî bi bîr anî.

Serok Barzanî diyar kir ku ev êrîş yek ji mezintirîn tawanên li dijî gelê Kurd e û got:

"Ev tawan destpêka pêvajoya bombebarankirina sivîlan bi çekên kîmyayî û berdewamiya siyaseta tunekirina gelê me bû. Rejîm bi vê êrîşê ranewestiya; piştî girtina bi dehan welatiyên me yên birîndar, wan bi hovane ew zindî veşartin."

Bangek ji bo Bexdayê

Serok Barzanî tekez kir ku êş û qurbaniyên ku gelê Kurdistanê kişandiye qet nayên jibîrkirin û bangek girîng ji Hikûmeta Iraqê re jî kir.

Serok Barzanî dubare kir ku divê rêveberiya Bexdayê, wekî mafek destûrî, tezmînatê bide malbatên birûmet ên şehîd û qurbaniyên kampanyaya Enfalê.

Serok Barzanî di dawiya peyama xwe de spasiya xwe ji bo têkoşîn û qurbaniyên gelê Balîsan û Şêx Wesanan anî ziman û got, "Di salvegera vê sûcê nemirovane de, em silavên xwe ji bo giyanên pîroz ên şehîdên xwe dişînin û bi dil û can êşa malbat û hezkiriyên wan parve dikin."