Starmer: Em ji bo şerekî demdirêj li Rojhilata Navîn amadekariyê dikin

PeyamaKurd - Serokwezîrê Brîtanyayê Keir Starmer diyar kir ku divê welatê wî ji bo qonaxek demdirêj a pevçûna berdewam a di navbera DYA û Îsraîlê de ji aliyekî ve û Îranê ji aliyê din ve amade bibe û got ku hikûmeta wî bi pîşesaziya parastinê re dixebite da ku pergalên parastina hewayî bi cîh bike da ku hevkarên xwe yên li herêma Kendavê biparêze.

Keir Starmer îro li ber komîteyek parlemanî axivî û got ku fikarên wan ên cidî li ser dabînkirina enerjiyê tune ne, lê divê hemî bala û enerjiya wan li ser kêmkirina bilez a rewşê be û divê planên wan li ser wê rastiyê bin ku ev rewş dikare demek dirêj berdewam bike.

Serokwezîrê Brîtanyayê ragihand ku welatê wî ji bo şandina pergalên parastina hewayî dixebite da ku hevkarên xwe yên li Kendavê biparêze û diyar kir ku wan bi lez pergalên parastina hewayî yên menzîla kurt li Behrêynê bi cîh kirine û heman gav wê ji bo Kuweyt û Erebistana Siûdî jî were avêtin.

Starmer tekez kir ku ev mijar ji dawiya hefteya borî ve girîngî û lezgîniyek zêdetir bi dest xistiye û ji ber vê yekê ew ê îro bi wezîrên xwe re civînek awarte li dar bixe da ku li ser planan nîqaş bike.

Ev gotinên Starmer piştî wê yekê tên ku Birîtanya di 18ê Adarê de ragihand ku ew hewildanên xwe ji bo piştgiriya hevkarên xwe yên li Kendavê zêde dike, di nav de kirîna moşekên konvansiyonel û navîn-menzîl ji bo hêzên xwe yên leşkerî û hevalbendên xwe yên li herêmê.