Sûriye | Li bajarê di bin kontrola Tirkiyê de teqîn: 30 kustî û birîndar

PeyamaKurd – Hate ragihandin ku şevê din, li bajarê Ezazê yê li bakurê Helebê ku di bin kontrola Tirkiye û komên çekdar de ye, teqîneke mezin çêbû.

Li gorî zanyariyên Çavdêriya Mafên Mirovan a Sûriyê (SOHR) belav kirine, di encama teqîna wesayîteke bombebarkirî de, zêdetirî 30 kes hatine kuştin û birîndar kirin.

SOHRê daye xuyakirin ku şeva borî di encama teqîna bombeyeke li navenda bazareke Ezazê de, 8 welatî hatin kuştin û 23 kesên din jî birîndar bûn.

Bajarê Ezazê 20 kîlometre nêzî Efrînê ye û di bin kontrola komên çekdar ên opozîsyona Sûriyê yên Tirkiye piştevaniya wan dike de ye ku gelek caran teqînên bi vî awayî li wir rû didin.