Trump ji bo lûtkeya NATOyê ya 36an gihîşt paytext Enqereyê
PeyamaKurd - Balafira Serokê Dewletên Yekbûyî yên Amerîkayê Donald Trump, bi mebesta beşdarbûna di Lûtkeya 36an a Serkirdeyên NATOyê de, îro li Balafirgeha Enqereyê danî.
Trump di dema gihîştina xwe ya balafirgehê de ji aliyê Serokkomarê Tirkiyeyê Recep Tayyip Erdoğan ve bi awayekî fermî hat pêşwazîkirin.
Ev serdan wekî rûdaneke dîrokî tê nirxandin; ji ber ku ev lûtke piştî 22 salan cara yekem e ku li Tirkiyeyê tê darxistin û Trump jî piştî 17 salan dibe yekemîn Serokê Amerîkayê ku serdaneke bi vî rengî dike.
Di vê geştê de heyeteke payebilind a fermanrewayiya Amerîkayê, ku di nav de Wezîrê Karên Derve Marco Rubio, Wezîrê Xezîneyê Scott Bessett û Wezîrê Parastinê Pete Hegseth cih digirin, ligel Trump amade ne.
Piştî temambûna merasîmên pêşwazîkirinê yên li balafirgehê, tê çaverêkirin ku her du serkirde rasterast derbasî Koşka Serokkomariyê bibin daku civîneke taybet û dûalî li dar bixin.
Di vê hevdîtina krîtîk de, ku berî destpêkirina bernameyên fermî yên lûtkeyê tê lidarxistin, dê pêwendiyên dîplomatîk, aborî û leşkerî yên navbera Washington û Enqereyê, her wiha alozî û geşedanên ewlehiyê yên herêmî û cîhanî werin gotûbêjkirin.
Ev hevdîtina rasterast a her du lîderan wekî destpêka pêngaveke nû ya di dîplomasiya herêmî de tê şîrovekirin.