Amerîka daxwaz dike bilez hikûmeta nû ya Iraqê were avakirin

PeyamaKurd – Balyozxaneya Amerîkayê bi daxuyaniyekê diyar kir, Amerîka daxwaz dike bilez hikûmeta nû ya Iraqê were avakirin. Herwiha pêşwazî li hilbijartina Serokatiya Encûmena Nûneran a Iraqê kir.

Balyozxaneya Amerîka li Bexdayê îro bi daxuyaniyekê diyar kir, Amerîka pêşwaziyê li rûniştina yekem a Parlamentoya Iraqê dike ku beşeke ji proseya demokratîk û serweriya niştimanî ya wî welatî ye.

Di daxuyaniyê de hat eşkerekirin: “Em germtirîn pîrozbahiyên xwe pêşkêşî Serokê Encûmena Nûneran Mihemed Helbûsî û her du cîgirên wî Hakim El-Zamilî û Şexewan Ebdullah dikin.”

Balyozxaneya Amerîka li Bexdayê bal kişand ser rola girîng a Iraqê di aramî û ewlehiya herêmê de û destnîşan kir: “Em hêvîdar in ku serkirdeyên Iraqê û parlamentoya nû, pêvajoya avakirina hikûmeta nû bilezînin.”

Herwiha di berdewamiyê de hat diyarkirin: "Hêviya me ew e ku hikûmeta nû piştî ku hat avakirin, îradeya gelê Iraqê nîşan bide û kar ji bo çareserkirina kêşeyên hikûmetê, mafên mirovan, ewlehî û aboriyê li Iraqê bike.”