Deklerasyona Platforma Yekîtiya Jinên Kurd?
Platforma Yekitiya Jinên Kurd ku dawiya sala derbazbuyî de li Amedê hatibu damezrandin daxwiyaniyek bi navê DEKLERASYONA “PLATFORMA YEKITIYA JINÊN KURD” jibo raya giştî belav kirin û em jî wî daxwiyaniyê wek xwe pêşkêşî xwenderên xwe dikin;
DEKLERASYONA “PLATFORMA YEKITIYA JINÊN KURD”
Em wek Jinên Kurd bi diruşmeya gotina “Ey Kurdino! Bibin yek; ku hûn nebin yek, hûnê biçin yek bi yek !” hatin cem hev. Me bi armanca avakirina Yekitiya Neteweyî û li hemberî zilm û zordariya li ser nasnameya Kurd û jinan û pişaftinê “Platforma Yekitiya Jinên Kurd” damezirand. Platforma me dê xebatên xwe li ser pîvanên li jêr pêk bîne.
Li ser vê bingehê Platforma Yekitiya Jinên Kurd:
- Ji destpêkê heta îro li her parçeyê Kurdistanê, hemû jinên ku di têkoşîna li hemberî zilmê de cih girtine wek nirxên xwe dibîne.
- Berjewendiyên neteweyî yên Kurdan û Yekitiya Jinên Kurd li pêş berjewendiyên hemû komele, sazî, insyatîf, tevger û partiyên siyasî dibîne.
- Hemû cudahiyên siyasî, olî û nasnameyan wek sedemên nakokiyan nabine; van cudahiyan wek pêwîstiyên demokratîk dihesbîne.
- Zimanê medyayê yê erênî jî bo Yekitiya Kurdan û jinan wek hewcedariyeke sereke ye û ji zimanê neyînî dûr sekinînê jî wek pêwîstiyekê dibîne.
- Girîngiyê dide tecrubeyên Jinên Kurd ên Porsipî û ji wan sûde werdigire; di pêvajoyên nakokî û pevçûnên navbera Kurdan de girîngiyê dide rista wan a çêker a yekitiyê.
- Zimên wek ji stûnên sereke yê nasnameyê dibîne û di vê çarçoveyê de piştgiriyê dide hemû xebatan.
- Girîngiyê dide zimanê diyalogê ya ji bo Yekitiya Jinan û ya Kurdan.
- Li hemberî hemû zilm, zordarî, tundî û cûdakariya li ser jinên Kurd û Kurdistanî derdikeve û ti cudahiyê nake navbera ol, mezheb û nêrinên siyasî yên jinan û li gel têkoşîn û vîna wan a hevpar cih digire.