Dîndar Zêbarî banga wek jenosîda Kurdan a naskirina Enfalê kir

PeyamaKurd - Berpirsê Rêkxistina Raspardeyên Navneteweyî yê Hikûmeta Herêma Kurdistanê Dîndar Zêbarî, di 38emîn salvegera karesata Enfalê de ragihand ku ev tawan ne tenê binpêkirineke mafên mirovan e, lê belê tawaneke sîstematîk a navneteweyî ye ku hemû peymannameyên cîhanî binpê kirine.

Zêbarî bal kişand ser wê yekê ku civaka navdewletî li pêşberî birîneke kûr a mirovahiyê ye û daxwaz kir ku Enfal wek jenosîdeke tam a li dijî hebûna neteweyî ya Kurd bê naskirin. Wî bibîr xist ku di vê pêvajoyê de zêdetirî 182 hezar mirov hatine şehîdkirin, tevî kîmyabarankirina Helebceyê û jenosîda li dijî Barzanî û Kurdên Feylî.

Berpirsiyariya qanûnî û qerebûkirina qurbaniyan

Di derbarê mafên qanûnî yên qurbaniyan de, Zêbarî destnîşan kir ku li gorî destûra Iraqê û qanûnên navneteweyî, berpirsiyariya rasterast a qerebûkirina madî û mînevî li ser milê hikûmeta federal e. Wî tekez kir ku ji bo kêmkirina derdeseriyên malbatên şehîdan, pêdivî bi pêngavên kiryarkî û dadperweriyeke veguhêz heye. Herwiha eşkere kir ku ew bi aliyên navxweyî û navneteweyî re di hevahengiyeke berdewam de ne da ku çarenivîsa windayan eşkere bikin û tawanên dijî mirovahiyê yên li Kurdistanê hatine kirin di qada navneteweyî de bidin nasîn.

Pabendbûna Hikûmeta Herêmê bi xizmetkirina kesûkarên şehîdan

Zêbarî herwiha behsa bizavên Hikûmeta Herêma Kurdistanê yên li Cinêvê kir, ku tê de bal hatiye kişandin ser windakirina bi zorê ya welatiyan wekî tawane de li dijî mirovahiyê. Wî diyar kir ku hikûmet ji bo parastina mafên qurbaniyan û dokûmentkirina tawanên wekî yên DAIŞê bi hemû hêza xwe dixebite. Di dawiyê de, Zêbarî tekez kir ku xizmetkirina kesûkarên şehîdan û wefaya ji bo xwîna wan, erkê sereke yê hikûmetê ye û ji bo vê yekê hewlên wan ên ji bo dabînkirina xizmetkariyan û naskirina van dosyeyan di asta cîhanî de dê berdewam bin.