Etrûşî: Elî Zeydî daxwazên Herêma Kurdistanê qebûl kirin

Cîgirê Serokê Parlamentoya Iraqê Ferhad Etrûşî ragihand ku di karnameya wezarî ya Serokwezîrê Raspartî Elî Zeydî de daxwazên bingehîn ên Herêma Kurdistanê hatine qebûlkirin.

Etrûşî destnîşan kir ku nûnerên Kurd ên ji PDK, YNK û opozîsyonê di komîteya amadekirina karnameyê de cih girtine û karîne Madeya 140ê, dosyeya petrol û gazê û mafên federalîzmê di bernameya hikûmeta nû de bi cih bikin.

Hêjayî gotinê ye, ev yek wekî serkeftineke girîng a nûnerên Kurd tê dîtin da ku nakokiyên dîrokî yên di navbera Hewlêr û Bexdayê de di çarçoveya destûrê de werin çareserkirin.

Sedemên paşketina rûniştina parlamentoyê

Derbarê dema rûniştina parlamentoyê ya ji bo dayîna baweriyê bi kabîneya Elî Zeydî jî Etrûşî diyar kir ku hîn tu dîrokeke fermî nehatiye diyarkirin. Sedema vê paşketinê jî ji bo nakokiyên navxweyî û berdewamiya danûstandinên dijwar ên di navbera aliyên Şîe û Suneyan de ye.

Etrûşî herwiha nûçeyên derbarê çûna hejmareke zêde ya parlamenteran ji bo hecê red kir û got ku ew bawer nake hejmar ji 30 kesan zêdetir be, lewma ev yek nabe asteng li pêşiya rûniştina parlamentoyê.