Li Sûriyê krîza mirovî: 16 zarokên Iraqî winda ne

PeyamaKurd - Ofîsa Ragihandinê ya Komeleya Gundên Zarokan a Sûriyeyê (SOS) eşkere kir ku çarenivîsa 16 zarokên Iraqî ku ji 6 malbatên cuda ne û di serdema şer de bi darê zorê ji aliyê rejîma Beşar Esed ve ji dê û bavên xwe hatibûn veqetandin, hîn jî nediyar e.

Hate diyarkirin ku ev zarok 12 kur û 4 keç in û di navbera dawiya sala 2013an û çaryeka yekem a sala 2014an de, di encama operasyonên girtinê yên berfireh ên dezgehên ewlehiyê yên rejîma berê de radestî navendên xwedîkirinê hatine kirin.

Komeleya SOSê da zanîn ku di navbera salên 2011 û 2022yan de, wan bi rêya Wezareta Kar û Barên Civakî bi giştî 140 zarokên ji neteweyên cuda yên mîna Sûriyeyî, Iraqî û Rûsî wergirtine û tomarkirin kirine.

Li gorî tomar û belgeyên fermî yên radestkirinê, dîroka jidayîkbûna van 16 zarokên Iraqî di navbera salên 1997 û 2011an de ye.

Her çiqas hatiye piştrastkirin ku bavên wan hemû bi eslê xwe Iraqî ne jî, lê ji ber kêmasî û nebûna zanyariyên têr, nasnameya dayîkan û parêzgehên ku jê hatine bi teqezî nayê zanîn.