Malbatên Êzidî yên koçber ên li Duhokê dest bi vegera Şingalê dikin

PeyamaKurd - Malbatên Êzidî yên koçber ên ku li kampên parêzgeha Duhokê dimînin, ji bo qonaxa nû ya vegera dilxwazî ya ber bi Şingalê ve dest bi qeydkirinê kirin.

Rayedarên Rêveberiya Koç û Koçberan a Duhokê diyar kirin ku di qonaxa nehemîn de tê pêşbînîkirin ku zêdetirî 400 malbatan ji kampan vegerin warên xwe.

Li gorî daxuyaniyan, di heşt qonaxên berê de nêzîkî 23 hezar kes vegeriyabûn Şingalê û ev pêvajo bi awayekî dilxwazî tê meşandin.

Her çend di qonaxên nû de sedan malbat vegerê hilbijêrin jî, hîn bi hezaran malbat li kampên herêmê û derveyî wan dijîn.

Ji ber wê jî saziyên navneteweyî û hikûmî balê dikişînin ser pêwîstiya avakirin û dabînkirina binesaziyê, ewlehiyê û derfetên jiyanê ji bo vegerineke domdar a civata Êzidî ku di sala 2014an de rastî fermanê hatibû.