Nêçîrvan Barzanî peyama sersaxiyê ji bo Îranê weşand

PeyamaKurd - Serokê Herêma Kurdistanê Nêçîrvan Barzanî piştî koça dawî ya Rêberê Bilind ê Îranê Elî Xamineyî peyamek sersaxiyê weşand.

Barzanî sersaxiyê ji bo gel, hikûmet û rêberiya olî ya Îranê anî ziman û got, "Em di vê dema dijwar de xemgîniya gelê Îranê parve dikin û hevxemiya xwe bi wan re diyar dikin."

"Divê aştî û aramî were parastin"

Di peyama xwe de Nêçîrvan Barzanî bal kişand ser rewşa hesas a herêmê û tekezî li ser çareseriyên aştiyane û aramiyê kir.

Herwiha diyar kir, "Di vê serdema krîtîk de, em girîngiya parastina aştî û aramiyê û çareserkirina pirsgirêkan bi rêbazên aştiyane ji nû ve tekez dikin."

Bang li Civaka Navneteweyî

Nêçîrvan Barzanî ji bo kêmkirina aloziyên herêmî bang li civaka navneteweyî kir û ev bang kir:

"Di vê serdema dijwar de, em bang li hemû aliyan û civaka navneteweyî dikin ku berpirsiyariya misogerkirina aştî û parastina aramiyê li herêmê bigirin ser xwe."

Peyama sersaxiyê ya ku ji hêla Nêçîrvan Barzanî ve hatî parvekirin vê daxuyaniyê dihewîne:

"Em ji ber şehadeta Ayetullah Elî Xameneyî, rêberê olî û alimê navdar ê Komara Îslamî ya Îranê, sersaxiyên xwe yên kûr ji gel, hikûmet û serokatiya Îranê re pêşkêş dikin. Em ji Xwedayê Teala lava dikin ku rehmetê bide wî û sebir û aramiyê bide malbata wî ya xemgîn û hemî hezkiriyên wî. Di vê serdema dijwar de, em bang li hemî aliyan û civaka navneteweyî dikin ku berpirsiyariya misogerkirina aştî û parastina aramiya herêmê bigirin ser xwe."