Partiyên Rojhilat îdiaya derbaskirina çekan a Îranê red kir

PeyamaKurd - Biryargeha Hemzeyê ya Supaya Pasdarên Îranê, ku serpereştiya çalakiyên leşkerî yên li parêzgehên Urmiye û Sineyê dike, li ser hesabê xwe yê Telegramê daxuyaniyek belav kir û îdia kir ku wan rê li ber operasyoneke qaçaxçîtiya çekan girtiye.

Biryargehê îdia kir ku hêzên Rojhilatê Kurdistanê yên ku li Herêma Kurdistanê bicih bûne, hewl dane bi nûnertiya Amerîka û Îsraîlê hejmareke zêde ya çek û teqemeniyên Amerîkayê yên nehatine bikaranîn derbasî parêzgeha Sineyê bikin.

Supaya Pasdaran îdia kir ku hêzên wan li parêzgeha Sineyê êrîş birine ser van koman û dest danîne ser hemû çek û cebilxaneyên wan, lê ti hûrgiliyên din derbarê windahiyên canî de parve nekirin.

Bersiva yekdeng a PDKÎ û baskên Komeleyê

Li aliyê din, berpirsên bilind ên partiyên Rojhilatê Kurdistanê rûbirûyî van îdiayan bûn û daxuyaniyên Îranê ji binî ve red kirin.

Endamê Navenda Birêveberiyê ya PDKÎ Heme Nezîf Qadirî ji medya Kurdistanê re ragihand ku wan tu carî ji aliyekî biyanî çek wernagirtine û ji bo parastina xwe hêz û çekên wan bi qasî pêwîst hene.

Herwiha Aram Muderisî ji Komeleya Şoreşgêr û Emced Husên Penahî ji Komeleya Zehmetkêşan tekez kirin ku tu bingeheke van nûçeyan nîne û ti hewleke bi vî rengî nehatiye dayîn.

Penahî destnîşan kir ku rejîma Îranê bi van propagandayên bêbingeh tenê dixwaze wê rastiyê veşêre ku wan axa Rojhilatê Kurdistanê veguherandiye leşkergeheke mezin.