Serok Barzanî: Em nabin parçeyek tevlîhevî û aloziyên herêmê

PeyamaKurd - Serok Mesûd Barzanî li Pîrmamê pêşwazî li Balyozê Balyozxaneya DYAê ya li Iraqê Steve Fagin û Şehbandera Giştî ya DYAê ya Hewlêrê Gwendolyn Wendy Green kir.

Di civînê de Serok Barzanî destnîşan kir ku siyaseta wan ji destpêkê ve zelal e; ew nabin parçeyek ji aloziyan û alîgirê ti pevçûnan.

Wî tekez kir ku çareserkirina hemû pirsgirêkan bi rêya diyalog, muzakere û dîplomasiyê ye. Her wiha piştgiriya xwe ji bo hikûmeta navendî ya Iraqê ser bingeha destûr, hevparî û xwerêveberiyê dubare kir.

Serok Barzanî bal kişand ser parastina mafên pêkhateyan—bi taybetî Xristiyanan—û destnîşan kir ku divê ti kes li ser navê wan biryarê nede û ji bo diyarkirina îradeya wan guherîna yasaya hilbijartinê girîng e.

Ji aliyê xwe ve, şanda Amerîkî diyar kir ku dawîhatina erka hêzên hevpeymanan nayê wateya bidawîbûna berpirsiyarî û piştgiriya DYAê ji bo Herêma Kurdistanê û Iraqê, û piştrast kir ku siyaseta Washingtonê ya hevkariya ewlehî, aborî û siyasî dê berdewam bike.