Ali Zeydi li New Yorkê bi Wezîrê Derve yê DYAê Marco Rubio re civiya
PeyamaKurd - Di dema ku zextên li ser Bexdayê ji bo tasfiyekirina komên çekdar zêde bûne, Serokwezîrê Iraqê Ali Zeydi li New Yorkê di çarçoveya rûniştina 81emîn a Civata Giştî ya Neteweyên Yekbûyî de bi Wezîrê Derve yê Dewletên Yekbûyî yên Amerîka (DYA) Marco Rubio re civiya.
Di hevdîtinê de pêşeroja têkiliyên DYA û Iraqê û hevkarîya stratejîk hatin gotûbêjkirin û Zeydi biryardariya hikûmeta xwe ya ji bo girtina hemû çekan di bin desthilata dewletê de dubare kir.
Li aliyê din, Wezareta Derve ya DYAê ragihand ku Rubio û Zeydi li ser giringiya hilweşandina milîsên terorîst, pêşîgirtina li êrîşên ji axa Iraqê û bi temamî dabînkirina serweriya Iraqê li hev kirine.
Rubio her wiha piştgiriya welatê xwe ji bo hewldanên hikûmeta Iraqê yên di warê xurtkirina saziyên dewletê, dabînkirina aramiya navxweyî û pêşvebirina aboriyê de dûbare kir.
Ev hevdîtin çend roj beriya dema dawî ya ku ji bo vekişîna hêzên Hevpeymaniya bi serokatiya DYAê ji Iraqê hatiye diyarkirin (30ê Îlonê) pêk hat.
Şêwirmendê Ewlehiyê yê Zeydi, Qasim Araci di daxuyaniyekê de diyar kir ku ji bo kontrolkirina çekan ti tarîxeke diyar tune ye, pêvajo dem dixwaze û di navbera aliyan de di atmosfereke erênî de tê meşandin.
Araci da zanîn ku hin kom amade ne çek deynin, lê Ketaib Hizbullah, Tevgera Nuceba û Ketaib Şüheda daxwazên bêçekkirinê red dikin, û hişyarî da ku piştî temambûna vê pêvajoyê her kesê ku bêyî destûr çekê hilgire dê wekî "qaçaxê zagon" bê dîtin.