Amerîkayê dorpêçên ser Îranê berfireh kirin

PeyamaKurd – Wezîrê Derve yê Amerîkayê Mike Pompeo, ragihand ku wan dorpêçên bo madeyên hesinî yên ser Îranê berfireh kirine û 22 metalên din xistine nav lîsteya dorpêçan.

Pompeo da xuyakirin ku Wezareta Derve ya Amerîkayê îro lîsteyeke 22 metalên ku Îran di çêkirina moşekên balîstîk û nukleerî de bikar tîne eşkere dike û yên bi zanebûn wan madeyan ji Îranê re bişînin wê rastî dorpêçan bên.

Herwiha wezîrê Amerîkî diyar kir ku Supaya Pasdarên Îranê kerta avadankirinê xistiye kontrola xwe û lewma jî wê hin keresteyên din ên bo Îranê têne şandin jî bikevin nav lîsteya dorpêçan.

Hêjayî gotinê ye, Amerîkayê piştî vekişîna ji peymana atomî ya ligel Îranê, dorpêç û cezayên aborî yên ser Îranê tund kirin.