Araqçî bang li Amerîkayê kir: Ji herêmê vekişin, Siûdî birayên me ne
PeyamaKurd - Wezîrê Derve yê Îranê Ebas Araqçî, daxuyaniyeke baldar da û ragihand ku êdî hebûna leşkerî ya Dewletên Yekbûyî yên Amerîkayê (DYA) li Rojhilata Navîn bi dawî bûye. Araqçî di peyama xwe de Erebistana Siûdî wekî “welatekî bira” bi nav kir.
Wêneya balafira AWACS wekî ‘delîla qelsiyê’ parve kir
Araqçî li ser hesabê xwe yê platforma medyaya civakî Xê, wêneyê balafireke radarê ya Amerîkî ya bi modela Boeing E-3 Sentry (AWACS) parve kir, ku tê îdiakirin li Baregeha Hewayî ya Prens Sultan a li Erebistana Siûdî hatiye rûxandin. Wezîrê Îranî ev bûyer wekî nîşaneya nekarîna Amerîkayê ya ji bo parastina hêzên xwe nîşan da.
“Amerîka nikare ewlehiyê dabîn bike”
Ebas Araqçî di peyama xwe de wiha got: “Tenê hewce ye hûn bibînin ka me çi bi sîstema wan a fermandariya hewayî kir. Ji ber vê yekê, dem hatiye ku hêzên Amerîkî ji herêmê werin derxistin. Ew dijminekî êrîşkar in ku ne rêzê li birayên me yên Ereb û ne jî li Îraniyan digirin. Bi xwezayî kapasîteya wan a dabînkirina ewlehiya herêmî tune ye.”
Peyameke germ ji bo Riyadê
Tevî ku baregeha Amerîkî ya hatiye lêdan li ser axa Siûdiyê ye, Araqçî hewl da peywendiyên Tehran û Riyadê biparêze. Wî destnîşan kir ku Îran rêzê li Erebistana Siûdî digire û got: “Em Siûdiyê wekî welatekî bira dibînin.”
Ev daxuyaniyên Wezîrê Derve yê Îranê nîşan didin ku Tehran hewl dide di navbera welatên Ereb û Amerîkayê de herizandinê (şikestinê) ava bike û Washingtonê wekî hêzeke "bêbandor" û "biçûkkirî" nîşan bide.