Çarçoveya Hevahengiyê ji bo diyarkirina Serokwezîr dicive

PeyamaKurd - Piştî hilbijartina Serokomarê Iraqê Hevpeymaniya Çarçoveya Hevahengiyê ya Şîe amadekariyan dike ku sibe 18ê Nîsana 2026an li Bexdayê bicive da ku li ser berbijarekî nû ji bo serokatiya hikûmetê li hev bikin.

Parlamenterê Fraksiyona Avedankirin û Pêşxistinê Fîras Meslimawî ragihand ku ev civîn ji bo derbaskirina binbesta siyasî û pabendbûna bi demên destûrî ye. Ev pêngava nû piştî wê yekê tê ku namzediya Nûrî Malikî ji ber nerazîbûna navneteweyî û bi taybetî ji ber rêgiriya Amerîkayê serî negirt û aliyên Şîe neçar man li ser kesatiyekî din bigihîjin encamekê.

Meslimawî destnîşan kir ku armanca wan pêkanîna "hikûmeteke xizmetker a niştimanî" ye ku daxwazên gelê Iraqê bi cih bîne.

Pêvajoya pêkanîna hikûmetê li Iraqê ji ber nakokiyên navxweyî û bandora lîstikvanên derve her tim bi astengiyan re rûbirû dimîne. Piştî hilbijartina Serokomar li gorî qanûnê divê di demeke diyarkirî de serokwezîr bê diyarkirin.