Çavkaniyên ewlehiyê îdiayên li ser êrîşa Bexdayê derewand: Tu Amerîkî li baregehê nebûn

PeyamaKurd - Çavkaniyeke payebilind a ewlehiyê ya Iraqê, îdiayên derbarê hebûna karmendên Amerîkî di dema êrîşa li ser baregeha Dezgeha Îstîxbarata Neteweyî ya Iraqê (INIS) de bi tundî red kir.

Hate ragihandin ku baregeha li taxa Mensûrê ya Bexdayê bi temamî ji aliyê kadroyên Iraqî ve tê birêvebirin.

Bîlançoya êrîşê: Efserekî payebilind hat kuştin 

Heman çavkaniyê ji ajansa Şefaq Newsê re eşkere kir ku di vê êrîşa bi drona xwekuj de, efserekî Iraqî yê bi pileya major (Raiyd) hatiye kuştin û efserekî din jî bi giranî birîndar bûye.

INISê ev rûdan wekî “êrîşeke terorîstî” pênase kir ku ji aliyê “komên qedexekirî” ve hatiye encamdan.

Îdiayên li ser medyaya civakî hatin redkirin 

Piştî êrîşê, li ser platformên medyaya civakî hinek nûçe belav bûbûn ku digotin di baregehê de karmendên Amerîkî bûne hedef. Lê belê, berpirsê ewlehiyê ev raport wekî “bi tevahî derew” bi nav kirin û tekez kir ku tu pêwendiya Amerîkayê bi wê navendê re tune ye.