CENTCOM: Me li 8,000 hedefên Îranê dan; şiyana leşkerî ya Tehranê pûç bûye

PeyamaKurd - Fermandariya Navendî ya Amerîkayê (CENTCOM) ragihand ku di nava sê hefteyên şerê li dijî Îranê de, hêzên Amerîkayê zêdetirî 8,000 hedefên leşkerî yên wî welatî bi serkeftî lêdane.

CENTCOM destnîşan dike ku şiyana şer a Tehranê rû bi rûyî herifîneke mezin maye.

“Hêzên deryayî û asmanî hatine pûçkirin”

Serokê CENTCOMê, Amîral Brad Cooper, di vîdyoyeke jinûvekirina operasyonel de diyar kir ku derbên giran li binesaziya leşkerî ya Îranê ketine û hêzên wan êdî nikarin tevbigerin. Cooper wiha peyivî:

Hêzên wan ên deryayî di cihê xwe de mane û naçin. Balafirên wan ên şer ên taktîkî êdî nafirin. Îranê ew şiyana xwe ya avêtina mûşek û dronan a bi rêjeya bilind,winda kiriye ku di destpêka şer de dihat dîtin.”

130 keştî û depoyên binê erdê hatin rûxandin

Li gorî amarên ku Amîral Cooper par ve kirine, di nava hedefên hatine hedefgirtin 130 keştiyên Îranî hene. Her wiha, balafirên Amerîkî bi taybetî xalên avêtina mûşekan ên binê erdê û depoyên stratejîk ên li peravên başûrê Îranê wêran kirine. Ev operasyon bûne sedem ku sîstema parastin û êrîşê ya Tehranê bi giranî pûç bibe.

Vekirina Tengava Hurmizê pêşîniya sereke ye

Cooper destnîşan kir ku bi van êrîşan şiyana Îranê ya ji bo astengkirina trafîka deryayî ya li Tengava Hurmizê bi awayekî berbiçav kêm bûye. Her çend derbarê dema vekirina tam a tengavê de hûrgulî nehatin dayîn jî, lê Washington tekez dike ku ew ê nehêlin Îran bazirganiya cîhanî bixe bin metirsiyê.

Ev daxuyanî nîşan dide ku stratejiya Amerîkayê ya ji bo têkbirina sîstematîk a şiyanên leşkerî yên Îranê encamên krîtîk bi dest xistine û artêşa Îranê êdî nikare wekî berê bersivê bide.