Çîn: Êrîşên li ser welatên Kendavê nayên qebûlkirin

PeyamaKurd - Hikûmeta Çînê, bi peyameke nerasterast hişyarî da Îranê û nerazîbûna xwe ya li hemberî êrîşên li ser welatên Kendavê nîşan da.

Pekînê tekez kir ku êrîşên li dijî sivîlan û binesaziyên neleşkerî bi tu awayî nayên qebûlkirin.

Pekîn: Em êrîşên li ser sivîlan şermezar dikin 

Berdevkê Wezareta Derve ya Çînê, Guo Jiakukun, îro (11ê Adara 2026an) di civîneke çapemeniyê de daxuyaniyek da û ragihand ku Çîn hemû êrîşên bêserûber ên ku welatên Kendavê hedef digirin, şermezar dike. Guo destnîşan kir ku armancgirtina sivîlan û navendên neleşkerî li dijî pîvanên navneteweyî ye.

Banga xweragiriyê

Berdevkê Çînê bang li hemû aliyên li Rojhilata Navîn kir ku xweragir bin û pêşî li zêdebûna rageşiyê bigirin. Ev daxuyaniya Pekînê di demekê de tê ku ji ber şerê navbera Îran û eniya Amerîka-Îsraîlê, gelek welatên Kendavê ketine bin metirsiya êrîşên mûşekî û dronan.

Peyameke ne rasterast ji bo Îranê 

Çavdêrên siyasî vê daxuyaniya Çînê wekî "hişyariyeke nerasterast" ji bo Tehranê dinirxînin. Çîna ku yek ji hevkarên herî nêzîk ên aborî yên Îranê ye, bi vê gava xwe nîşan dide ku ewlehî û aramiya li Kendavê ji bo berjewendiyên wê yên enerjiyê û aboriya cîhanê xeta sor e.

Çîn bi vê helwêstê daxwaz dike ku şerê heyî ber bi welatên cîran ve neçe û binesaziya enerjiyê ya li herêmê nebe hedefa pevçûnan.