Di erdhêja Kolombiyayê de zêdetirî 130 kesan can da

PeyamaKurd - Li Kolombiyayê di 10ê tebaxê de erdhêjeke bihêz a bi mezinahiya 7,4 pileyan çêbû. Hat ragihandin ku di encama erdhêjê de hejmara kesên ku jiyana xwe ji dest dane gihîştiye 132yan û zêdetirî 480 kes birîndar bûne.

Li gorî daneyên Saziya Lêkolînên Jeolojîk a DYAyê, erdhêj di seet 07.34an de li gorî seeta herêmî û di kûrahiya 107 kîlometreyan de pêk hatiye.

Navenda erdhêjê wekî bajarokê San Jose del Palmar ê li herêma Choco ya li rojavayê welat hat diyar kirin û ev lerzîn li hemû welat û li dewletên cîran Ekvador, Venêzuêla û Panamayan jî hat hestkirin.

Li hemû welat rewşa awarte hat ragihandin û Serokkomar Espriella ji bo birêvebirina midaxileya bilez çû paytext Bogotayê.

Ekîbên rizgarkirinê diyar dikin ku yek ji bajarên ku herî zêde ji vê karesatê bandor lê bûye bajarê Pereîrayê ye ku 55 kîlometreyan ji navenda erdhêjê dûr e. Li vî bajarî li meydana sereke ya bi navê Plaza Bolivarê avahiyek bi temamî hilweşiya. Rayedarên herêmî dan zanîn ku tenê li navenda bajêr herî kêm 40 kesan jiyana xwe ji dest daye û di nav 65 avahiyên ku hilweşiyane de herî kêm 15 kes asê mane û xebatên rizgarkirinê berdewam dikin.