Fînlandiya amadekariyê dike ku destûrê bide îtxalkirina çekên nukleerî

PeyamaKurd - Wezîrê Parastinê yê Fînlandiyayê Antti Hakkanen planên sivikkirina qedexeya çekên nukleerî ragihand ku ji sala 1980an vir ve li welêt di meriyetê de ye û destûrê dide îtxalkirina çekên nukleerî.

Di civîneke çapemeniyê de li Helsînkî, Hakkanen diyar kir ku rewşa ewlehiya cîhanî ji ber pêşketinên piştî êrîşa Amerîka û Îsraîlê ya li ser Îranê nîgeran e.

Hakkanen bi bîr xist ku ji sala 1980an vir ve qedexeya çekên nukleerî li Fînlandiyayê heye û got, "Em plan dikin ku vê qedexeyê sivik bikin û destûrê bidin îtxalkirina çekên nukleerî bo Fînlandiyayê. Lêbelê, ev tenê wê bi rewşa parastina leşkerî ya Fînlandiyayê ve girêdayî be. Anîna çekên nukleerî bo Fînlandiyayê ji ber sedemên din wê qedexe bimîne."

Hakkanen hûrgulî li ser ka çekên nukleerî wê çawa werin anîn bo welêt neda, lê got, "Armanca Fînlandiyayê ne ew e ku çekên nukleerî bi awayekî daîmî bi cîh bike."

Di vê navberê de, partiyên muxalefetê yên li Fînlandiyayê nerazîbûna xwe li hember gavên ku di derbarê îtxalkirina çekên nukleerî de werin avêtin nîşan dan.

Ajansa nûçeyan a YLE, ku li welêt weşanê dike, ragihand ku hikûmetê planên xwe yên çekên nukleerî bi endamên parlementoyê re nîqaş kiriye û tê payîn ku di mehên havînê de guhertinên qanûnî werin kirin.