"Heta ku 5 xalên peymanê bi temamî bi cih nebin em bendên din bi cih naynin"

PeyamaKurd - Serokê Şandeya Parlamento û Danûstandinê ya Îranê Mihemed Bager Qalibaf got ku Tehran wê bendên mayî yên Peymana Têgihîştinê ya ku bi DYAyê re hatiye îmzekirin bi cîh neyne heta ku pênc xalên sereke, di nav de bidawîbûna şerê li Lubnanê, bi tevahî neyên bicîhanîn. Piştî vê daxuyaniyê, hevpeyvîna serokê danûstandkar li ser televîzyona dewleta Îranê ji nişka ve hate qutkirin.

Qalibaf diyar kir, "Danûstandin gihîştine encamê. Niha em ji bo bicîhanîna van di çarçoveya demê ya diyarkirî de hevrêzî û diyalogê dikin. Heta ku pênc xalên peymanê bi tevahî neyên sabîtkirin û dawî li wan neyê, em ê neçin qonaxa din ku bendên din lê werin bicîhanîn."

Ev daxuyanî di demekê de tên ku şandeyên DYA û Îranê amadekariyan dikin ku roja Çarşemê li Dohayê bi navbeynkarên Qeter û Pakistanî re danûstandinên teknîkî yên cuda bikin.

"Dewlemendkirin mafê me ye"

Qalibaf destnîşan kir ku danûstandinên li ser Peymana Têgihîştinê ya 14 xalan piştî çend mehan ji danûstandinan bi dawî bûn. Kalibaf diyar kir ku armanca civînên heyî tenê çavdêriya pêvajoya bicîhanînê ye û got ku rawestandina êrîşên li Lubnanê û rawestandina dewlemendkirina uranyûmê ji bo vê pêvajoyê girîng in.

Kalibaf got, "Xetên me yên sor zelal in: Dewlemendkirin mafê me ye. Ev nayên guftûgokirin; ew pêkhateyên hêza me û garantiya me li dijî daxwazên zêde yên Amerîkî ne."

Rayedarê Îranî peyman wekî serkeftinek mezin a dîplomatîk bi nav kir. Kalibaf îdîa kir ku wan soz wergirtine da ku pevçûna li Lubnanê bi dawî bikin, dorpêça deryayî ya Amerîkî li ser Îranê rakin, Tengava Hurmuzê rêkûpêk bikin, sînorkirinên hinardekirina petrolê sivik bikin û hebûnên cemidî berdin.