Hewlêr û Bexdayê li ser ewlekariya şîrketên petrolê li hev kirin
PeyamaKurd - Berdevkê Fermandariya Bilind a Hêzên Çekdar ên Iraqê ragihand ku şandeya leşkerî û ewlehiyê ya hikûmeta federal û rayedarên Hikûmeta Herêma Kurdistanê li ser nexşerêyek bihêz ji bo parastina şîrketên petrolê û pêşîgirtina li êrîşên li dijî wan li hev kirine. Li gorî agahiyan, armanc ev peyman ji nû ve destpêkirina hilberîn û hinardekirina petrolê ye.
Şandeyeke leşkerî û ewlehiyê ya asta bilind a Iraqê, bi serokatiya Serfermandarê Hêzên Çekdar ên Iraqê û Şêwirmendê Leşkerî yê Serokwezîr, Ebdulemîr Yarallah, serdana Hewlêrê kir. Şande bi Serok Mesûd Barzanî, Serokê Herêma Kurdistanê Nêçîrvan Barzanî û Serokwezîr Mesrûr Barzanî re civiya.
Berdevkê Fermandariya Bilind a Hêzên Çekdar ên Iraqê Sabah Numan di daxuyaniyek nivîskî de diyar kir ku alî li ser nexşerêyek bihêz ji bo parastina şîrketên petrolê û pêşîgirtina li êrîşên li dijî wan li hev kirine.
Li gorî Sabah Numan, armanca vê peymanê afirandina şert û mercên guncaw ji bo ji nû ve destpêkirina hilberîn û hinardekirina petrolê, vejandina aboriyê û piştgirîkirina hewldanên ji nû ve avakirinê ye.
Hilberîna Petrolê Piştî Êrîşan Rawestiya
Hilberîna petrolê li Herêma Kurdistanê ji ber êrîşên li ser zeviyên petrolê ji hêla komên çekdar ên nêzîkî Îranê ve hate rawestandin. Ev êrîş bi destpêkirina şerê Îranê bi DYA û Îsraîlê re hevdem bûn.
Serdana şandeya Iraqî bo Hewlêrê armanc dikir ku hevrêziyê ji bo parastina zeviyên petrolê û şîrketên veberhêneran ên ku di sektora enerjiyê de li Herêma Kurdistanê dixebitin xurt bike.
Berdevkê Fermandariya Bilind a Hêzên Çekdar ên Iraqê diyar kir ku her du alî li hev kirine ku hewldanên hevbeş ên di navbera artêşa Iraqî û hêzên Pêşmerge de ji bo çareserkirina kêmasiyên ewlehiyê û jiholêrakirina terorê bidomînin.