Hikûmeta nû ya Iraqê bawerî stand: 14 wezîr hatin pejirandin

PeyamaKurd - Parlamentoya Iraqê îro 14'ê Gulana 2026'an bi amadebûna Serokê Herêma Kurdistanê Nêçîrvan Barzanî û 270 parlamenteran civiya.

Di rûniştinê de, karnameya wezarî ya Serokwezîrê Raspartî Elî Zeydî bi piraniya dengan hat pejirandin.

Herwiha, pêvajoya dengdanê bi ser ket û 14 wezîrên kabîneya nû (di nav de wezaretên Derve, Petrol, Dad û Darayî) dengê baweriyê wergirtin. Ev yek wekî gaveke girîng a ji bo destpêkirina fermî ya karên hikûmeta nû hat nirxandin.

Aloziyên di deqîqeyên dawî de

Tevî pejirandina karnameyê û 14 wezaretan, dema dora dengdana li ser wezaretên mayî yên wekî Navxweyî, Plankirin û Xwendina Bilind hat, di navbera parlamenteran de alozî û pevçûnên dijwar derketin.

 Ji ber vê krîzê û têkçûna aramiyê Serokê Parlamentoyê neçar ma ku rûniştinê ji bo demeke nediyar paş bixe.

Hêjayî gotinê ye, her çend hikûmet bi piraniya wezîran hatibe avakirin jî, lihevkirin li ser hinek postên stratejîk hîn çênebûye.