Îranê şertên nû ji bo derbasbûna ji Tengava Hurmuzê danîn!
PeyamaKurd - Mihemed Reza Rezaei Kochi, Serokê Komîsyona Nûavakirinê ya Parlamentoya Îranê, diyar kir ku pêşnûmeqanûnek berfireh ji bo rêveberiya Tengava Hurmuzê hatiye amadekirin û wê di demek nêzîk de were pejirandin, û got ku wê şertên nû û hişk li ser keştîyên ku di vê rêya avê ya stratejîk re derbas dibin werin ferzkirin.
Di daxuyaniyekê de ji bo medyaya dewletê ya welêt, Rezaei Kochi got: "Parlamentoya Îranê pêşnûmeqanûnek amade kiriye ku dê di demek nêzîk de were temamkirin. Li gorî vê projeyê, kontrola Îranê li ser Tengava Hurmuzê wê bêtir were hişkkirin."
Çar şertên sereke
Li gorî pêşnûmeqanûna nû ya Parlamentoya Îranê, çar şertên sereke ji bo derbasbûna keştîyên bazirganî û tankerên petrolê ji tengavê hatine destnîşankirin:
1. Qedexeya Îsraîlê: Derbasbûna her bar û keştîyên ku bi Îsraîlê ve girêdayî ne wê bi tevahî were qedexekirin.
2. Şertê destûrê ji bo welatên dijmin: Keştiyên ji welatên ku wekî "dijmin û dijber" têne dabeşkirin, bêyî destûra Konseya Bilind a Ewlekariya Neteweyî ya Îranê, mafê wan tune ku ji tengavê derbas bibin.
3. Mercê tazmînatê: Welatên ku zerar dane Îranê, heya ku zerarê nedin, nikarin Tengava Hurmuzê bi kar bînin.
4. Dayîna bacê bi Riyal: derbasbûna ji Tengava Hurmuzê wê bi xercê (bacê) were kirin û ji welatên têkildar tê xwestin ku vê xercê bi pereyê Îranê, Riyal, bidin.
%70ê Dahatê wê ji bo Feydeyên Giştî were veqetandin
Di pêşnûmeyê de herwiha tê destnîşankirin ka dahata ji van xercên transîtê wê çawa were xerckirin. Li gorî vê,%30ê dahatê wê ji bo xurtkirina binesaziya leşkerî û kapasîteya Hêzên Çekdar ên Îranê were veqetandin, dema ku%70ê mayî wê ji bo baştirkirina şert û mercên jiyanê û refaha gel were veqetandin.
Tengava Hurmuzê, yek ji girîngtirîn rêyên transîta enerjiyê ya cîhanê, piştî destpêkirina şerê di navbera Amerîka û Îsraîl û Îranê de di 28ê Sibatê de ji aliyê Îranê ve hate girtin. Karbidestên Îranî diyar dikin ku kontrola tengavê ji niha û pê ve bi tevahî di destê Hêzên Çekdar ên Îranê de ye.