Ji Barrack hişyariya Siwêda: Komên çete valahiyê tije dikin

PeyamaKurd - Nûnerê Taybet ê Amerîkayê yê Sûriyeyê Tom Barrack li ser hesabê xwe yê Xê daxuyaniyek belav kir û nerazîbûna xwe li hemberî ji nû ve destpêkirina aloziyên li parêzgeha Siwêda ya Sûriyê anî ziman.

Barrack bi bîr xist ku nêzîkî salekê berê nexşerêyeke sêalî ya aştiyê bi armanca parastina mafên civaka Dûrziyan û vegerandina aramiyê hatibû îmzekirin, lê niha nebûna rêveberiyeke xurt rê dide komên çete ku valahiyê tije bikin û zirarê bidin gelê herêmê.

Barrack her wiha destnîşan kir ku Hikûmeta Sûriyeyê dest bi darizandina wan kesan kiriye ku di tîrmeha par de tevlî tawanên giran bûbûn û ev gav wekî "çavkaniyeke hêviyê" bi nav kir. Nûnerê Amerîkayê bang li hemû aliyan kir ku ji tundiyê dûr bikevin, bi diyalogê pirsgirêkan çareser bikin û hişyarî da ku alternatîfa gotûbêjê ne serkeftin, lê şîn e.