Li Saksonyaya Almanya êrîşa çekdarî: 2 kuştî û birîndar hene

PeyamaKurd - Li bajarê Neustadtê yê eyaleta Saksonyaya Almanyayê, di encama êrîşeke çekdarî de 2 kesan jiyana xwe ji dest da û kesek jî bi giranî birîndar bû.

Rêveberiya Ewlehiyê ya Dresdenê ragihand, piştî ku li ser Kolana Maxim-Gorki ya li navenda bajarê Neustadtê dengê çekan hat bihîstin, tîmên polîsan bilez sewqî cihê bûyerê hatine kirin.

Polîsên ku gihîştin avahiyê, cenazeyên du kesan û birîndarekî giran dîtin. Kesê birîndar ji bo dermankirinê şandin nexweşxaneyê û li herêmê tedbîrên tund ên ewlehiyê hatin girtin.

Lêpirsîna li ser sedema êrîşê berdewam dike

Heta niha nasnameya qurbaniyan û sedema vê êrîşa çekdarî ji aliyê rayedaran ve nehatiye eşkere kirin.

Polîsê Almanyayê li ser bûyerê lêpirsîneke berfireh daye destpêkirin û hemû îhtîmalan dinirxîne.

Li gorî nûçeyên di medyaya Almanyayê de cih girtine, polîs li ser gumanên wekî "êrîşa çekdarî", "pevçûn" û "kêşeyên nav malbatê" radiweste.

Ji bo ewlehiya hemwelatiyan, kolana ku bûyer lê qewimiye ji bo demekê hatiye girtin.