Li Washingtonê 2 sîxurên Îranê yên ketibûn nav polîsê federal hatin girtin

PeyamaKurd – Hat ragihandin ku du kesên nêzî supaya pasdarên Îranê ku li Amerîkayê bi awayekî sextekarî xwe wekî polîsê federal ê amerîkî nîşan dane, hatine binçavkirin.

Li gorî ragihandina kanala CBS a Amerîkayê du kesên ku xwe bi navê rayedarên Ewlehiya Polîsê Federal yên Amerîkayê dabûn nasandin, tê texmînkirin bi ser supaya pasdarên Îranê û saziya ewlehiya Îranê ve bûn, roja 7ê Nîsanê hatine binçavkirin.

Dadgeha amerîkî ragihandiye ku du kesên bi navên “Ariyen Tahirzade û Heyder Elî” bi sedema ku bi sextekarî xwe wekî Polîsên Federal ên Amerîkayê dane nasandin û xwe nêzîkî hejmarek ji rayedarên dezgeha Ewlehiya Amerîkayê kiribûn, hatine binçavkirin.

Hat zanîn ku polîsê FBIyê li bajarê Washingtonê ew du kesên sîxurên Îranê di mala wan de binçav kirine û niha jî di girtîgehê de ne.

Herwiha li gorî medya Amerîkî kesê bi navê Heyder Elî ku di pasporta wî de 2 vîzeyên Îranê jî hene ji hin kesan re gotiye, ew girêdayî dezgeha Ewlehiya Pakistanê ye, lê heta niha ew îdiaya wî nehatiye piştrastkirin.