Ofîsa Xamaney derbarê rewşa wî de agahî dan: Birîndar e
PeyamaKurd - Berpirsê Protokola Ofîsa Rêberê Bilind ê Îranê Mucteba Xamaney, Mazaher Huseynî, derbarê êrîşa 28ê Sibatê ya Amerîka û Îsraîlê de ku mala Xamaney kiribûn armanc, daxuyanî dan. Huseynî agahiyên nû derbarê kêliya êrîşê û rewşa tenduristiya Xamaney de parve kirin.
Cihê ku lê bû bi awayekî birêkûpêk dihat lêdan
Huseynî diyar kir ku di dema êrîşê de ew bi xwe jî li ofîsê bûye û herêma ku Xamaney lê dima rasterast hatiye hedefgirtin.
Huseynî got: "Dema bombardimanê, 70-80 metre nêzîkî me, cihê ku Elî Xamaney lê bû hat lêdan. Cihê ku Mucteba Xamaney lê ders dida, bi temamî hat rûxandin. Dijmin bi awayekî plankirî û birêkûpêk rasterast xala ku ew lê bû hedef digirt."
Rewşa tenduristiya Xamaney
Derbarê nûçeyên "birînên giran" de, Huseynî eşkere kir ku Mucteba Xamaney ji ber bandora teqînê li erdê ketiye û di pişt û lingê wî de birînên sivik çêbûne. Huseynî îdiayên ku digotin "ji eniya xwe birîndar bûye" red kirin û got: "Tenê li pişt guhê wî birîneke biçûk heye. Rewşa wî ya giştî baş e û niha ber bi başbûnê ve diçe."
‘Dê di dema xwe de bi gel re biaxive’
Huseynî bal kişand ser sedema dûrketina Xamaney ji çavê gel û got ku ev yek ji ber "ewlekariyê" ye û destnîşan kir ku dijmin dixwaze deng an jî wêneyekî wî bi dest bixe daku ji bo armancên xwe bikar bîne, lewma niha parastina wî di asta herî bilind de ye.
Huseynî herwiha got: "Heke dema wê hat, ew ê rasterast bi gel re biaxive. Hêz û daxwaza wî ya ji bo lîdertiya gel di cih de ye."