Politico: Pentagon xwe ji bo şerekî heta meha Îlonê amade dike

PeyamaKurd - Rojnameya navdar a Amerîkî "Politico"yê eşkere kir ku Wezareta Parastinê ya Amerîkayê (Pentagon) bi lezeke mezin planên xwe yên îstîxbaratî û leşkerî li dijî Îranê berfireh dike.

Li gorî agahiyên ku ji çavkaniyên navxweyî hatine wergirtin, Washington û Îsraîl xwe ji bo operasyoneke ku dibe ku heta meha Îlona 2026an dirêj bike amade dikin. 

Yek ji nîşaneyên herî berbiçav ên vê amadekariyê daxwaza nû ya Fermandariya Navendî ya Amerîkayê (CENTCOM) ye. Fermandariya ku navenda wê li Tampa ye, daxwaz kiriye ku hejmareke zêde ya efserên îstîxbarata leşkerî ji bo herî kêm 100 rojan bêne erkdarkirin.

Ev hêzên zêde dê rasterast piştgiriyê bidin operasyonên asmanî û îstîxbaratî yên li dijî binesaziya leşkerî ya Îranê, ku tê payîn dê ev piştgirî heta dawiya havînê û destpêka payîzê berdewam bike.

Her çend Serokê Amerîkayê Donald Trump di daxuyaniyên xwe yên vê hefteyê de behsa çar heta pênc hefteyan kiribe jî, wî bi xwe jî hişyarî dabû ku dibe ku pêvajoya şer "gelek dirêjtir" bibe.

Analîstên Politicoyê balê dikişînin ser wê yekê ku zêdekirina karmendên îstîxbaratê nîşan dide ku rêveberiya Trump xwe ji bo kampanyayeke herêmî ya berfireh amade kiriye ku armanca wê ne tenê derbekirina Îranê, lê pûçkirina temamî ya şiyanên wê yên leşkerî yên stratejîk e.