Şîeyên Iraqê biryara namzedê serokwezîr didin: Gelo Malikî vekişiya?

PeyamaKurd - Li gorî zanyariyên ku ji çavkaniyên Çarçoveya Hevahengiyê hatine wergirtin serokê Hevpeymaniya Dewleta Yasa Nûrî Malikî biryar daye ku ji bo posta serokwezîrtiya Iraqê nebe namzed.

Malikî di vê çarçoveyê de vekişîna xwe qebûl kiriye û li şûna xwe Serokê Desteya Lêpirsîn û Dadperweriyê, Basim Bedrî, wekî namzedê nû pêşniyar kiriye. Tê payîn ku ev guhertin îşev (15ê Nîsana 2026ê) di civîna serkirdeyên Şîe de bi fermî were nîqaşkirin.

Her çiqas Malikî Basim Bedrî wekî alternatîf nîşan dabe jî, li gorî zanyariyan heta niha di nav komên nav Çarçoveya Hevahengiyê de lihevkirineke tam li ser vî navî pêk nehatiye. Pêvajoya yekalîkirina namzediya Bedrî dê bi du rêyan be; an dê hemû alî bi lihevkirinê (konsensus) bigihîjin encamekê, an jî dê di nav civatê de dengdanek were kirin û bi dengê piraniyê navê wî were pesendkirin. Ev yek nîşan dide ku di nav mala Şîeyan de hîn jî nîqaşên kûr berdewam dikin.

Civîn îşev e

Heke tu guhertineke ji nişka ve neyê pêş, biryar e ku civîna girîng a Çarçoveya Hevahengiyê saet heştê êvarê dest pê bike. Ev civîn wekî xaleke werçerxanê di pêvajoya avakirina hikûmeta nû ya Iraqê de tê dîtin. Siyasetmedar û raya giştî bi baldarî li benda encamên vê civînê ne, ka dê Basim Bedrî bibe namzedê fermî yê kotala herî mezin a parlamenê an dê navên nû werin rojevê.