Trump: Cezayên CAATSA yên ser Tirkiyê radikim
PeyamaKurd - Serokê Dewletên Yekbûyî yên Amerîkayê (DYA) Donald Trump, di civîna hevpar a ligel Serokkomarê Tirkiyeyê Recep Tayyip Erdogan de, ragihand ku ew cezayên CAATSAyê yên li ser Tirkiyeyê radikin û got: "Ez naxwazim Tirkiyeyê û hevalê xwe di nav cezayan de bixapînim."
Her du serkirde berî civîna xwe ya taybet a li Koşka Serokomariyê daxuyanî dan rojnamevanan.
Trump bal kişand ser dostaniya xwe ya ligel Erdoğan û hêza leşkerî ya Tirkiyeyê û diyar kir ku Erdogan serokekî mezin e ku li seranserî cîhanê rêz lê tê girtin. Serokê Amerîkayê destnîşan kir ku Tirkiyeyê îspat kiriye ku ji gelek welatan bêhtir hevpeymaneke dilsoz e û da zanîn ku di vê hevdîtina dûalî de ew dê mijarên wekî zêdekirina qebareya bazirganiyê, hevkariyên pîşesaziya parastinê, dosyeya Îranê û bi taybetî firokeyên şer ên F-35an gotûbêj bikin û biryarekê bidin.
Serokkomarê Tirkiyeyê Recep Tayyip Erdoğan jî bal kişand ser girîngiya stratejîk a lidarxistina Lûtkeya Serkirdeyên NATOyê ya li Enqereyê û destnîşan kir ku amadebûna Trump di vê proseyê de hêzeke cuda dide ruhê hevpeymaniyê.
Erdogan derbarê bernameya firokeyên F-35an de ku Tirkiye ji ber kirîna sîstema parastinê ya S-400 ji projeyê hatibû dûrxistin, hêviyên xwe anîn zimên û ragihand ku ev mijar ji bo wan ne nû ye û berê soza radestkirina 5 balafiran wergirtine.
Serokomarê Tirkiyeyê got: "Ez bawer dikim ku di vê lûtkeyê de ji bo dosyeya F-35an dê biryareke xêrê derkeve. Em nêzîkatiya birêz Trump a avaker dizanin û hêvî dikim ku ew ê li ser soza xwe bisekine û ev gotûbêj bibin pêngavên berbiçav ên ji bo paşerojê."