YE gotinên Von der Leyen ên li ser Tirkiyeyê sererast kirin

PeyamaKurd - Piştî daxuyaniya Ursula von der Leyen ku Ewropa divê di bin bandora Rûsya, Tirkiye an Çînê de neyê hiştin, Berdevka Komîsyona Yekîtiya Ewropayê (YE) zelal kir ku Tirkiye hevalbendek girîng a NATOyê û welatek namzedê YEyê ye û got, "Tirkiye ji hêla aborî û siyasî ve şirîkek bê guman girîng e li herêmê."

Berdevka Komîsyona YEyê derbarê gotinên Von der Leyen de daxuyaniyek nivîskî weşand.

Di daxuyaniyê de hat gotin, "Behskirina Tirkiyeyê nîşanek giraniya wê ya jeopolîtîk, mezinahî û armancên wê ye, nemaze li Balkanên Rojava. Ew ne wekî berawirdkirinek bi welatekî din re ye."

Berdevk tekez kir ku Tirkiye ji hêla aborî û siyasî ve şirîkekî bê guman girîng e li herêmê, û destnîşan kir ku ev yek di warên stratejîk ên wekî rojeva girêdanê, Korîdora Navîn a Trans-Kaspîyan ku Tirkiye stûnek sereke ya herêmê ye û hevkariya demdirêj di rêveberiya koçberiyê de eşkere ye.

Berdevk diyar kir, "Tirkiye di heman demê de hevalbendek girîng a NATOyê û welatek namzedê YEyê ye. Di vî warî de, ew muxatabekî sereke ye."

Von Der Leyen çi got?

Di çalakiya salvegera 80emîn a rojnameya Die Zeit li Hamburgê de, von der Leyen piştgiriya xwe ya ji bo berfirehkirina YEyê tekez kir û got, "Divê em di temamkirina parzemîna Ewropayê de bi ser kevin da ku ew nekeve bin bandora Rûsya, Tirkiye an Çînê. Divê em mezintir û jeopolîtîktir bifikirin."

Seroka Komîsyona YEyê Ursula von der Leyen roja Duşemê diyar kir ku divê Ewropa di bin bandora Rûsya, Tirkiye an Çînê de neyê hiştin.