Ahmet Turk li ser pêvajoyê: Gel baweriya xwe wenda kiriye!

PeyamaKurd - Siyasetmedarê Kurd Ahmet Turk diyar kir ku ew nabêjin pêvajoya aştiyê rawestiyaye, lê neavêtina gavên berbiçav ji aliyê hikûmetê ve baweriya gel bi pêvajoyê qels kiriye.

Hevşaredarê Şaredariya Bajarê Mezin a Mêrdînê Ahmet Turk, ku ji aliyê qeyûmekî ku ji aliyê hikûmetê ve hatiye tayînkirin ve hate guhertin, li ser pêvajoya aştiyê ji Rûdawê re axivî.

Turk diyar kir ku gelê Kurd ji bo aştî û biratiya di navbera gelan de gavên girîng avêtine, lê di berdêla wê de bersivek erênî nestendiye.

"Projeyên wan çi ne?"

Ahmet Turk, destnîşan kir ku hikûmetê di derbarê pêvajoyê de tu proje an pêşniyar pêşkêş nekiriye û got:

"Projeyên wan çi ne? Ew dixwazin çi bikin? Bi rastî jî di vê mijarê de tu agahî li cem me tune. Ji ber vê nezelaliyê, îro gel dibêje 'me baweriya xwe wenda kiriye'. Tiştek berbiçav tune."

Turk diyar kir ku mesele ne tenê li ser tayînkirina qeyûman e û got, "Gelê Kurd neteweyek e. Heta niha di derbarê nasname, ziman û çanda vî gelî de tu gav nehatiye avêtin. Mesele ne tenê rawestandina şerê çekdarî ye; meseleya rastî avêtina gavan bi rêya demokrasiyê ye."

"Sebra gel diqede"

Turk diyar kir ku wan her tim ji bo biratiya gelên Kurd û Tirk parêzvanî kirine, lê di vî warî de tu pêşveçûn nedîtine û got:

"Erê, em nabêjin ku pêvajo rawestiyaye, lê sebra gel diqede.

Em dixwazin bizanin niyeta wan ji bo pêşerojê çi ye, ew çi plan dikin. Pêdivî ye ku em agahdar bibin, lê heta niha me tu pêşketinên erênî nedîtine."

"Em naxwazin bê gotin ku Kurdan pêvajo têk birine"

Ahmet Turk diyar kir ku ew ê bi sebir pêvajoyê bişopînin û wiha domand:

"Ger ev pêvajo têk biçe, em dixwazin hemû gelên Kurd û Tirk bibînin ku sedema wê ew e ku hikûmetê daxwazên gelê Kurd bicîh neaniye. Em bi eşkereyî nêrînên xwe tînin ziman ji ber ku em naxwazin ev qonax bi vî rengî biqede."