BP ji Kerkûkê vekişiya: Iraqê operasyonên li çar zeviyên petrolê girtin ser xwe

PeyamaKurd - Piştî vekişîna ji nişka ve ya şirketa petrolê ya Brîtanî BP, Şirketa Petrolê ya Bakur (NOC) a Iraqê ragihand ku wan hemû operasyonên li çar zeviyên sereke yên petrolê yên li Kerkûkê girtine destê xwe. Ev biryar wekî tedbîreke lezgîn ji bo parastina asta hilberînê hat girtin.

Çar zeviyên stratejîk di bin kontrola NOCê de ne

Li gorî nameyeke fermî ya rêveberiya Şirketa Petrolê ya Bakur ku di 7ê Adara 2026an de hatiye weşandin, çar zeviyên giring ên bi navên Bay Hessen, Habbaz, Jambour û Kerkûk niha ji aliyê tîmên teknîkî yên Iraqê ve bi têne birêvebirin. Hat ragihandin ku NOC dê ji bo heyama salekê hemû karên tamîrkirin, vekolîna boriyan û kontrolkirina valvên petrolê li van zeviyan bimeşîne.

Vekişîna BPê rasterast bi rewşa ne aram a herêmê û şerê ku di 28ê Sibatê de di navbera Îran, DYA û Îsraîlê de dest pê kiriye, ve girêdayî ye. Ji ber metirsiyên ewlehiyê, karmendên şirketê neçar man ku zeviyên petrolê biterikînin. Çavkaniyên ji hundirê NOCê ji Rûdawê re piştrast kir ku ji bo rê li ber bandora neyînî ya vê vekişînê were girtin, wan di heman rojê de dest bi girtina operasyonan kiriye.

BPê di sala 2024 û 2025an de peymaneke berfireh a 16 salan bi hikûmeta Iraqê re îmze kiribû. Li gorî vê peymana stratejîk, BPê plan dikir ku hilberîna petrolê li Kerkûkê bigihîne 500,000 bermîlan di rojê de û her wiha veberhênanên mezin li ser rezervên gaza xwezayî bike. Lê belê, şerê li herêmê ev projeya mezin a aborî rû bi rûyî astengiyên giran hiştiye.

Şirketa Petrolê ya Bakur tekez dike ku armanca wan a niha ew e ku herikîna petrolê raneweste û zirar negihîje binesaziya van zeviyan. Çavdêrên aborî diyar dikin ku vekişîna şirketên navneteweyî çêdibe ku derbeyeke giran li binesaziya enerjiya Herêma Kurdistanê û Iraqê bixe, eger şer dirêj bibe.